護級「細」紀大戰 切爾達薩拉鬥悶

猪拉多纳

今晚西甲上演護級大戰，由「包尾大幡」切爾達主場迎戰尾二嘅薩拉戈薩。呢場「6分波」大家都輸唔起，預計會踢得較謹慎，況且兩軍鋒力疲弱入波唔慌多，1.7倍入球細夠穩陣。

（now632台周二凌晨4:00直播）
鋒力弱1場入唔到1粒

呢兩隊波排喺榜尾位置唔係冇原因o架，雙方今季同樣面對鋒力不足嘅問題，平均1場都入唔到1球，而且切爾達首席射手伊亞高艾斯巴斯今仗仲要繼續坐波監，而頂替佢嘅朴主永射術明顯差一截，咁搞法佢哋隨時連續第3場食白果。

對手薩拉戈薩同樣破關乏力，近6場比賽中有4場只可以望門興嘆，就連喺主場都咬唔入同樣係護級部隊嘅CF格蘭納達，就知佢哋鋒力幾弱。呢班波幾乎依賴前鋒普斯迪加一個搶分，換言之切爾達今場一定落Order睇實佢，要佢惡唔出。

值得留意雙方都有後衞復出加強守力，切爾達有迪美杜夫重返大軍，薩拉戈薩亦有兩閘阿巴謙明尼路同沙普拿路候命，咁搞法入球細真係夠晒穩陣。