拜仁唔赦地上最強

猪拉多纳

安聯布陣拆巴塞金漆招牌

最強對最強！拜仁大戰巴塞舉世矚目，歐聯準決賽首回合周三凌晨於拜仁慕尼黑安聯球場上演，呢個準決賽戲碼被廣泛認為係冠軍前哨戰，稱得上當今歐洲甚至世界最強嘅雙雄對決。領導歐洲球壇多年嘅地上最強巴塞隆拿有得受讓？皆因對手呢一刻已經成為地上最狂，拜仁係世上實力同巴塞最接近嘅球隊，加上勇達巔峰嘅狀態同主場之利，絕對有條件喺首回合拆對手「地上最強」嘅金漆招牌，拜仁讓平半，推介上盤。

（有線61及201台周三凌晨2時45分直播）
歇冬後數據贏晒

雙方喺各自聯賽一早甩開對手，巴塞稱霸西甲只係時間問題，而拜仁更已篤定奪得德甲冠軍，因此大家都可以專注備戰。相比之下，巴塞上周末主場對利雲特，美斯同碧基連後備名單都唔入，布斯基斯、佐迪艾巴同馬斯巴查亦冇落場，其餘主力好似恩尼斯達、沙維同柏度洛迪古斯都踢唔晒，最終僅小勝一粒，留力留到出晒面。反觀拜仁作客對漢諾威仍排出較強陣容，取得今季第4次贏6比1嘅賽果，其實教練軒歷基斯唔係唔想留力，只不過陣中球員太過搶韁，而且爭位踢情況嚴重，個個都唔想做後備，最終只係畀丹迪、拿姆同舒韋恩史迪加休息，列貝利、湯馬士梅拿同馬里奧高美斯都踢唔足全場。

無可否認，拜仁近況比巴塞更勇銳，單計歇冬後成績，拜仁踢19場贏咗18場，入59球失9球，相反巴塞24戰只得14勝6和4負，得62球失27球，無論勝率同埋場均得失球率都係拜仁佔優。尤其歐聯8強戰賽前大家都認為巴塞條籤更靚，但主客兩回合都贏唔到巴黎聖日耳門，相反拜仁兩回合都輕取祖雲達斯，呢4場波係狀態分野嘅最佳指標。
靠美斯扭轉戰局

兩軍實力堪稱當世最強，巴塞屈機式控球在腳互傳踢法稱雄於世，但拜仁呢方面亦唔係輸蝕，巴塞個別球星級數高，但單計正選拜仁更平均、防線更穩、後備兵源更足，主場出擊有力先勝一仗。

當然，巴塞擁有當世最佳球員美斯，仍然可以寄望佢憑一己之力扭轉局勢，不過啱啱傷愈嘅佢能否即時回復十足狀態，實在係一大疑問。最強對最強，邊隊入決賽要打晒兩回合至有分曉，但首回合賽事，拜仁贏面確在巴塞之上，讓平半上盤可取。