宇宙最強間中都會受傷……

猪拉多纳

近來同班波友傾開歐聯決賽組合，大家都估會係西甲內訌，我反而認為德甲內訌機會大啲，咪睇小德甲球隊先得o架！今晚歐聯四強首回合戲碼先有德甲「一哥」拜仁慕尼黑主場鬥西甲「一哥」巴塞隆拿，唔使問阿桂，實大把人買巴塞。不過今次巴塞竟然受讓呀，簡直似祈福黨引你，呢個世界邊有咁着數啊？

淨睇初步盤口都知呢場拜仁有贏面，講真當今世上真係冇第二隊讓得起巴塞喎！睇番八強巴塞作客億萬大軍巴黎聖日耳門，外國初盤巴塞都要讓半一，但今場作客拜仁受讓平半，可想而知啲人幾咁睇好拜仁！
軒歷基斯求教哥帥係笑話

好多球迷猜軒歷基斯會問哥迪奧拿攞料對付巴塞，我就唔多同意，軒歷基斯本身都好有料，98年帶過皇馬贏歐聯冠軍，使鬼問個後輩咩！喺軒歷基斯帶領下，拜仁進攻質素相當高，近期經常大炒對手，今晚對巴塞雖然有文迪蘇傑停賽，卻奧斯繼續養傷，但拜仁後備兵力質素喺歐洲數一數二，根本冇影響，馬里奧高美斯近三場轟入六球，預計佢今場會踢箭頭，加上列貝利、洛賓、湯馬士梅拿、舒韋恩史迪加等都可以上陣，咁嘅人腳點會入唔到巴塞波呀？

巴塞後防一向唔穩陣，今晚仲要冇咗受傷嘅佩奧爾同馬斯真蘭奴，唔失波至奇。球王美斯都喺大軍名單，不過據小道消息話其實佢腳傷仲未好番晒，今晚可能頂硬上。巴塞真係好依賴佢，冇佢就攻極都唔入局，八強次回合對巴黎聖日耳門，唔係美斯下半場帶傷上陣救亡，根本就出唔到線，所以今晚巴塞想贏真係好有難度！

歌仔都有唱：「宇宙最強間中都會受傷……」，睇嚟今屆最有資格令巴塞受傷嘅就只得拜仁喇！
推介：拜仁慕尼黑 上盤