阿拉巴盯死美斯 拜仁讓得起巴塞

猪拉多纳

歐聯4強 青訓激鬥

歐聯4強首回合大戰今晚上演！打頭陣戲碼係拜仁慕尼黑主場迎戰巴塞隆拿，雖然巴塞被譽為「地上最強」兼捧盃大熱，不過拜仁今季嘅戰鬥力亦唔輸蝕，論狀態同近況，拜仁更加係喺巴塞之上。今晚呢支德甲班霸喺安聯球場出擊，又度定凍結美斯大計，無論拜仁有無搵哥迪奧拿做軍師，阿占都認為佢哋絕對讓得起巴塞，撐1.88倍上盤！

（有線61、64、201及203、中央5台周三凌晨2:45直播）

要數當今歐洲球壇「當紅炸子雞」，拜仁敢認第二，肯定冇人敢認第一！佢哋破紀錄提前捧走德甲冠軍，德國盃又殺埋入決賽，依家向住三冠王目標進發，士氣同狀態都勁到冇朋友，最恐怖係佢哋喺聯賽已經出二線兵，但依然場場輕輕鬆鬆大開殺戒，證明呢隊波無論正選同後備都係弗到勒唔住，8強主客兩回合各贈意甲一哥祖雲達斯兩蛋，就知拜仁有幾咁犀利啦！
文迪蘇傑停賽 高美斯一樣掂

講開拜仁嘅後備兵源，不得不提「瑞士美斯」梳頓沙基利，呢隻快翼每次後備落場都搞到對手雞毛鴨血，萬一今場波有咩冬瓜豆腐，都隨時可以入替列貝利或者洛賓，夠晒煞食！係，拜仁正選箭頭文迪蘇傑今晚要坐波監，不過大家咪忘記所謂嘅「後備殺手」，其實係講緊馬里奧高美斯，呢位德國國腳喺盃賽6分鐘內連中三元，絕對畀到大家信心。即使係「第3前鋒」比沙路，上仗一樣省兩粒，橫睇掂睇，冇咗件文迪蘇傑，小豬同拿姆又有輕傷在身，但影響唔算太大囉。
巴塞3大守將缺陣

對家巴塞嘅賽前焦點落晒喺美斯身上，呢位阿根廷球星嘅大腿傷患已經冇咩事，今場肯定可以復出搏殺。不過經歷8強對巴黎聖日耳門驚險晉級後，大家睇到巴塞並唔係想像中咁勁，美斯今場狀態亦唔係100%，而且《慕尼黑日報》尋晚爆料，拜仁已經準備用阿拉巴全程凍結美斯，實行用肌肉男壓制「跳蚤」，巴塞嘅戰鬥力肯定會隨之減弱，何況巴西守將艾迪安奴停賽，佩奧爾同馬斯真蘭奴賽前又話要養傷，今場作客想全身而退，真係唔多樂觀。
拜仁豪取8連勝

‧拜仁連贏8場，馬里奧高美斯近3場入6球。

‧巴塞近9場比賽不敗。

‧巴塞今屆歐聯作客只得2勝1和2負。
巴塞攻強守弱好「大」鑊

拜仁雖然有射手文迪蘇傑唔踢得，不過另一位箭頭馬里奧高美斯最近都交足功課，加上拜仁中場齊腳，相信要取得入球唔難。對手巴塞鋒力有幾強唔使多介紹，問題係「地上最強」有守將佩奧爾、馬斯真蘭奴有傷在身，防線有隱憂。翻查紀錄，巴塞已經連續4場盃賽作客有失波，1.8倍「入球大」可以一試。
頂占筍盤：拜仁慕尼黑（上盤）