歐聯搗蜂巢 C朗有辦髮

猪拉多纳

皇馬當家球星C朗現時以11個入球領先歐聯神射手榜，佢近排腳風極順，最近九場賽事除咗上仗聯賽對貝迪斯之外，場場有波入，效率都幾得人驚。C朗入波勁之外，亦都出名姿整，落場開波前一定gel「行」個靚頭，早排佢興摷亂，呢排就梳個「許文強」頭，今場歐聯4強戰首回合作客「蜜蜂兵團」多蒙特，C朗又會施展佢嘅「髮術」，蠟靚條三七界，希望為自己帶嚟好運。

（有線61及201台周四凌晨2時45分直播）

C朗每次出場都會gel唔同髮型，畀吓新鮮感球迷，但最重要一點就係一定見晒成個額頭，C朗身邊朋友話，佢好滿意自己個額生得靚，加上方便比賽時頂頭槌，所以頭髮一定唔會遮住前面，所以即使平時練波都gel不離身。
梳「三七界」腳風特順

雖然C朗成日「變髮」，All back、許文強頭、摷亂等乜都有，但只要出席一啲佢認為重要嘅場合，就一定會分界，好似舊年西甲頒獎禮，同埋代表葡萄牙出征歐國盃前與葡國總統見面時，條界零舍明顯。

無獨有偶，今季C朗喺歐聯對阿積士大演帽子戲法一役，亦係分咗條三七界，所以佢今場出征多蒙特亦好大可能咁分界，至於會係摷起定撳扁，大家就要拭目以待。