巴素利主場大晒

猪拉多纳

砌英超兵特醒喪攻車仔

歐霸盃4強首回合瑞士巴素利主場迎戰英超名牌車路士，巴素利變咗英超球隊殺手，近兩次歐洲賽鬥英超隊表現好醒神，上圈兩戰熱刺大踢進攻足球，令人留下深刻印象，今次硬撼車仔料會繼續喪攻，預期會同對手合演入球騷，大盤有2.02倍博得過！

（有線61及201台周五凌晨3時05分直播）
上屆歐聯 主勝紅魔

巴素利上年喺歐聯分組賽兩鬥英超勁旅曼聯1勝1和，主場贏2比1，作客奧脫福一役同對手踢成3比3，最終成功力壓「紅魔鬼」晉級。巴素利喺今屆歐霸盃證明上年砌低曼聯並非符碌之作，大軍8強對住英超實力分子熱刺照攻可也，殺對手一個措手不及，淨係左腳仔穆罕默德沙拿已經搞到熱刺防線立立亂，結果兩回合同樣踢成2比2，互射12碼仲贏埋，論表現佢哋更勝一籌。不過，巴素利史上9次作客英格蘭未嘗一勝，如想殺入決賽，必須把握主場之利爭取優勢，今戰將毫無保留搶攻。
防線甩漏 費托回勇

車路士贏埋歐霸盃就可幫老細阿布儲齊英超及歐洲主要盃賽冠軍，全軍上下都有心爭標，不過佢哋近排踢得太密，未計今場賽事，自3月30號至今踢咗8場，枕住一周雙賽，負荷太大，難免要作出取捨。車仔對上兩圈作客同樣輸波，對手係布加勒斯特星隊同魯賓卡山，攻力唔算好勁，但大軍整體發揮一般，上圈造訪魯賓卡山後防甩漏極多，好在隊中射手費蘭度托利斯已經回勇，加埋域陀摩西斯同夏薩特等從後支援，有本錢撕破對手防線。

巴素利今屆歐霸盃主場未嘗敗績，食住個勢定必主攻爭勝，車仔勝在把握力強，往往能夠一擊即中，呢場雙方埋身肉搏鬥砌，相信會炮製唔少士哥，入球大有計！