費倫巴治主場惡埋葬賓菲加

猪拉多纳

歐霸盃4強首回合由土耳其班霸費倫巴治主場對葡超「一哥」賓菲加，主隊喺今屆賽事憑住一條前利物浦市雙雄脊骨「尤保+魯爾梅利斯+古積特」踢出水準，一路逢關過關，氣勢勁爆，對住實力高唔得幾多嘅賓菲加根本未驚過！足智彩開賓菲加讓平半，力奇撐1.81倍下盤！（有線62及202周五凌晨3:05直播）

土耳其球隊嘅「地獄主場」聲威一向勁到冇朋友，費倫巴治喺主場又點會咁易畀賓菲加恰得死。再者，佢哋踏入2013年喺歐霸盃演出的確醒神，合共6戰取得3勝3和，強如意甲拉素嚟到都淨吞兩蛋，力奇真係唔知今晚賓菲加憑乜讓波囉？

睇番費倫巴治人腳，前愛華頓中堅尤保踢法一向勇悍過人，踢過利物浦同車路士嘅葡萄牙中場魯爾梅利斯無論分波定後上入球能力都一流，至於前紅軍前鋒古積特出名效率高，能傳擅射嘅佢可以帶起成條鋒線，喺前線拍住撞得頂得嘅喀麥隆坦克車韋保，真係贏埋都唔出奇啦！
賓菲加作客土耳其不勝

仲有一點，費倫巴治依家喺土超落後畀「一哥」加拉塔沙雷成7分，喺聯賽剩番4輪下想追個冠軍難度極大，相對嚟講，打多3場好波贏個歐霸盃同球迷交代可能較易，試問佢哋今鋪點會唔搏命先？

賓菲加呢邊，由歐聯轉戰歐霸，的確表現神勇，至今6戰取得5勝1和。只係講到底，呢班「賓仔」就算實力稍勝主隊，都唔會作客話贏就贏，翻查往績，佢哋歷來3次出訪土耳其只係錄得2和1負，未贏過o架！後防重心加雷又只係新傷初愈，狀態令人懷疑，作客讓波？你捧埋我份啦！
雙方近期旺開細

兩軍唯一一次對賽係75至76年足協盃，賓菲加兩回合大勝7:1。

賓菲加今屆歐霸盃不敗，並已經38場正式賽事法定時間內不敗。

‧費倫巴治近7戰全開入球細，賓菲加亦連續4場開細。
歐霸盃賽制

4強淘汰賽分主客兩回合制，今輪為首回合賽事。若兩回合賽和則計算作客入球，未分勝負即加時30分鐘，再和則互射12碼決勝負。