里爾大盤索多鋪

猪拉多纳

歐聯、歐霸激戰過後，今晚注意力又集中番聯賽，阿King睇中法甲里爾主場對索察，里爾為爭下屆歐聯參賽資格，近期以攻代守，上仗完場前連轟兩粒反勝巴斯蒂亞令士氣大振；不過索察備受降班威脅，冇得揀之下焗攻爭勝，既然主勝冇肉食，寧捧入球大。

（周六凌晨2時30分開賽）

法甲一向以少交收見稱，不過里爾卻係異數，近11仗有9場開大，該隊前鋒沙洛文卡勞以前於車仔只係二打六，但轉戰法蘭西後盡顯身價，今季於聯賽已累積8個士哥，季中佢要代表科特迪瓦參加非國盃，一度令里爾陷入谷底，可見其重要性。里爾上仗作客巴斯蒂亞，完場前五分鐘由盧卡斯迪治尼同巴沙各建一功，協助球隊奇跡反勝。依家里爾位列第五，其實只係差「三哥」里昂3分，爭取歐聯入場券尚未絕望，往後賽事一定火力全開搶分。
索察護級作客照攻

對手索察現排尾三，護級形勢水深火熱，聯賽剩番五輪，就算作客里爾都要豁出去搶攻，照秤主隊實力勝一籌，但主勝得1.3倍實在太奀，既然兩軍爭勝欲咁強，勢必合演入球騷，大盤有1.75倍好路。至於德乙尾二的辛特侯遜已連輸三場，護級機會相當渺茫，相反波琴兩連勝，為求早日上岸必搏到盡，捧客勝。最後蘇超羅斯郡不復季中連場不敗氣勢，與下屆歐霸資格漸行漸遠，況且近六次對登地聯未贏過，主場讓唔起對手，「讓球客勝」有計。