賓福特唐卡衝冠大作戰

猪拉多纳

英甲煞科日重頭戲，由「小三」賓福特主場對「阿二」唐卡士打。現時積分榜形勢方面，榜首般尼茅夫已取得直接升班資格，另上一個直升席位就係「賓唐」之爭。由於頭三支積分差距相近，「賓唐」嘅勝方仲可能趕過般尼茅夫成為聯賽冠軍，既然今場比賽咁重要，雙方必定豁出所有以爭取最大成就。賽前賓福特守衞夏利爾甸就話，今場係佢人生最重要嘅比賽，爭取入球贏得比賽係唯一目標。唐卡士打領隊白賴仁芬恩就話唔會縮後防守，況且唐軍眾將志切衝冠，叫佢哋死守或造成反效果，總之今場兩方肯定會對攻，大盤可作過關重心。

（周六晚10時開賽）