紅軍冇哨牙蘇惡唔出樣 喜鵲急於上岸撐得過

猪拉多纳

今晚英超有場紐卡素主場鬥利物浦嘅大戰，兩隊目前狀態都唔算太好，雙方近3場未嘗1勝，紅軍依家喺聯賽高不成低不就，「咬人王」蘇亞雷斯今場開始又停賽10場，前景唔多樂觀。相反紐卡素只係多尾3嘅韋根6分，而且仲要踢多一場，再唔及早搶分上岸，壓力會愈來愈大，今晚一於支持受讓嘅紐卡素1.6倍「讓球主勝」。

（有線200及300、廣東體育周日凌晨0:30直播）
施斯包辦紐卡素入波

紐卡素喺歐霸盃雖然畀賓菲加踢咗出局，但可以專注番本土聯賽搶分未嘗唔係一件好事。隨住射手丹巴巴亞1月離隊，柏比斯施斯喺隊波嘅地位顯得更為重要，對上5場球隊入波差唔多由佢一手包辦，只要施斯能夠保持狀態，相信紐記好快可以成功上岸。既然佢哋今晚主場出擊，戰意亦喺利物浦之上，搶分成功一啲都唔奇。

利物浦上仗同車路士踢咗一場精彩比賽，蘇亞雷斯完場前再做救世主幫球隊追和2:2，不過佢咬伊雲洛域一事被足總重罰停賽10場，而利物浦最終又決定唔上訴，所以今場就係佢漫長波監嘅開始，紅軍冇咗「哨牙蘇」變冇牙老虎，作客點都信唔過啦！