皇馬冇C朗馬體會趁機破咒

猪拉多纳

馬體會「破咒」之戰？今晚西甲爆發馬德里打吡，由於皇馬要為下周歐聯4強翻身戰留力，加上C朗有傷或缺陣，有「老虎」法卡奧復甦嘅馬體會，今晚要喺主場打破近9戰對賽全敗嘅魔咒、甚至爆冷贏波，絕對唔係發夢，平手盤捧1.92倍嘅 主勝啦！

（now632台周日凌晨2:00直播）
收起沙比 奧斯爾留力歐聯

皇馬喺歐聯4強首回合作客畀多蒙特怒炒4:1，家陣陷出局邊緣，飽受批評嘅教練莫連奴當然唔會為咗個冇得爭嘅聯賽冠軍，冒險畀班主力上陣啦！為咗留力次回合嚟個絕地大反擊，可以預期沙比阿朗素、奧斯爾、華拉尼等主力都未必會上陣，家陣西班牙《阿斯報》仲爆料話C朗拿度有輕傷，今晚唔會冒險落場，「銀河艦隊」 用副選班底應戰嘅話，未必可以好似舊時咁輕鬆搞掂馬體會o架！
法卡奧復甦 哥斯達Top弗

馬體會首循環作客輸畀皇馬並唔出奇，皆因佢哋今季作客戰績並唔理想，近10輪只贏過3場咁大把，反觀喺主場16戰贏足14場，明顯返到卡達朗球場係兩班波！更好彩嘅係法卡奧重拾狀態，近4輪入足4球，加埋迪亞高哥斯達狀態大勇，想射穿近13場賽事得2次保得住清白嘅皇馬，絕非難事，仲好有機會全取3分添！好似中場基比咁講，佢哋等咗咁多年，爭勝欲望已去到頂點，唔趁今季強勢搞掂宿敵，又等幾時先？