巴利仔主宰熱刺歐聯夢

猪拉多纳

加里夫巴利的確有料到，一復出就幫熱刺逆轉反勝曼城精彩絕倫，所以抵熱刺主席利維咁牙擦將佢標價1億鎊（約12億港元），問題係最終值唔值呢個價，就要睇下巴利仔幫唔幫到熱刺攞到下屆歐聯入場券，今晚作客韋根肯定會殺無赦！

嚟緊英超大家焦點會放喺歐聯入場券爭奪戰，排第2嘅曼城應冇走雞，跟手嗰兩張就係由「倫敦三雄」阿仙奴、車路士同熱刺之爭，「兵工廠」同「藍戰士」今季表現起伏不定，反而熱刺後勁凌厲，尤其係只要有加里夫巴利在陣，佢哋喺英超贏面近6成。家陣巴利仔龍精虎猛，令到主帥保亞斯嘅整體攻守戰術更加平衡，特別係多咗從後插上同埋禁區外圍嘅遠射。

今晚對手韋根最大破綻就係死球防守甩漏多，加上護級壓力沉重，又要分心足總盃決賽對曼城，球員夢寐以求喺溫布萊披甲，對住勢兇夾狼嘅熱刺一就住踢會好牙煙！