替天行道擺明出擊

猪拉多纳

　　除非今日落大雨，爆到七彩就冇辦法，大賽日嘛，點都係吼住大馬房熱門實力馬，作為追捧對象。以大摩為例，今日出馬又多又惡，而14匹出賽馬裏，近半數配上馬偉昌，新面孔貝湯美分到3駒。據了解，那批馬之中，大多有心出擊，勿睇小。

　　第三場四班1400米。「歡惑」近數仗表現穩定，開始展示出自己能力，但唔好期望好大，事關現年3歲，未完全成氣候，下季至係豐收期，目前四班則恰可。今仗再跑1400米，雖然又排外檔，馬偉昌汲取上場走蝕位教訓後，寄望今場取位醒醒定定，以隻馬之前能夠力迫「神聖火炬」，只要發揮無誤，點會冇得贏。

　　第五場二班1800米。「替天行道」身價係貴，奈何暫時成績平平，未適應，急亦冇用，而來港跑至第4仗，應該差唔多跑夠，唔係都未必用到愛將。如果睇過上場走勢，呢匹馬目前1800米會比更長路程有把握，地慢得唔得，好難斷定，不過，睇隔夜飛，曾被捧至廿幾蚊大熱W，位置仲要低到極，墊底飛有晒，一定有心出手。

　　第七場二級賽1400米。「恩格斯」遠征歸來，唔係好多日子重新準備，如果未回復水準，其實未使急於一時，大摩唔一定要派佢上陣。既然之前有本事力追「天久」獲亞，已經表現出自己有幾勁、有幾銳，若然今場演出維持水準，呢批對手，冇幾多隻夠佢跑。