摩納哥強勢搶W篤定升班

猪拉多纳

喺法乙深陷降班漩渦嘅色當，近排忽然反彈搶咗唔少分，但細心留意佢哋嘅對手全部係中下游分子，對住硬淨啲嘅甘岡即刻唔夠砌，今晚面對志切奪冠重返法甲嘅摩納哥，就算有主場之利都幫唔到幾多，摩納哥客勝難得有2.1倍咁好分頭，萬勿錯過！

（開賽時間：周二凌晨2:30）
色當欺善怕惡

摩納哥目前領先第4位嘅卡昂10分，今場贏波就肯定升班，之不過佢哋喺踏入2013年已經唔識個輸字點寫，整整14場冇輸過，近期仲愈嚟愈Sharp醒，連續兩場派蛋畀對手，除咗防線穩陣抵讚，謝明同恩歷克卡拉斯高呢對年輕箭頭，狀態弗到連首席射手伊巴謙托尼都要讓路打後備，班波撳都撳唔住，目標又點只升班咁簡單吖，梗係想過埋冠軍癮，今場要贏波鞏固榜首唔成問題。

另邊廂，色當雖然及時反彈，不過實力始終有限，面對護級對手勒芒同GFCO阿些斯奧識得贏波，對住中游嘅勒哈弗爾、朗斯同阿勒斯淨係和波，主場火併「三哥」甘岡就即刻輸波，正路到不得了，如果唔係揸住主場鬥摩納哥12勝7和4負嘅往績，賠率邊有可能咁熱吖，但係家陣一隊爭冠軍、一隊要護級，我就唔相信呢啲「往績」喇！