FC廣州拆車保首名

猪拉多纳

雖然已經提早出線，但佢哋今屆矛頭直指亞冠盃寶座，將會力爭首名晉級鋪好冠軍路！即使主帥納比停賽，仍可順利贏波，捧主勝！

（廣東體育及中央5台周三晚8時直播）

先睇F組形勢，榜首球隊FC廣州穩奪出線席位，今戰和波肯定首名晉級，二哥全北汽車對賽贏第三位浦和紅鑽，再添一分亦可出線，和波可謂一家便宜兩家着。唔少人用陰謀論分析呢場波，認為兩隊會踢「默契波」屈死紅鑽，不過，廣州擁有穆里奇、孔卡同巴里奧斯等超級外援，倒不如打真軍搏盡咪仲實際。

況且全北汽車來者不善，若然廣州一個唔覺意輸埋次名晉級，16強要鬥H組首名日職勁旅柏雷素爾，仲失去兩回合賽事「先客後主」優勢，隨時影響爭冠前途，實在博唔過！廣州上次作客浦和紅鑽輸波，更有主帥納比及守將張琳芃被逐，兩人今戰要停賽，納比就可以喺看台遙控指揮，對調兵影響唔大。
全北汽車主力有傷

全北汽車06年稱霸亞冠盃，11年屈居亞軍，計級數當然高啦，但今屆班波踢落冇乜霸氣，重心球員伊連奴受傷患困擾，惡唔出樣！兩隊上屆亞冠盃分組賽同樣被編埋一組，無獨有偶，廣州都係喺五一勞動節主場鬥全北汽車，當時佢哋主場輸一比三，今次再度交手，有望喺班主場Fans面前贏波威番鋪。