巴塞「大」爆發 打倒拜仁霸權

猪拉多纳

維帥講明半場要贏2粒

今晚歐聯4強次回合，巴塞隆拿喺魯營大戰「德甲霸權」拜仁慕尼黑。首回合拜仁雖意外大勝4:0，但我唔認為巴塞會因此Game Over，始終已經好番晒嘅美斯威力無窮，教練維蘭路華更表明目標係上半場隊2粒，火氣咁猛，1.43倍入球大要捧！

（有線61、64、201及203、中央5台周四凌晨2:45直播）

歐聯歷史上從未有球隊首回合輸0:4後，可以喺次回合反敗為勝晉級，何況巴塞面對嘅係如日方中嘅拜仁？不過巴塞16強首回合都係作客先輸0:2畀AC米蘭啦，之後返到主場大勝4:0贏凸！既然之前受大腿傷困擾嘅美斯已經好番晒，難怪維蘭路華咁有信心打閃電戰，16強逆轉AC米蘭嗰場，咪就係美斯上半場入2粒先囉！

巴塞防線殘陣失球激增

之但係，巴塞條防線仲有好多問題，左閘佐迪艾巴上場無無謂食咗張黃牌，搞到今場要停賽，加上佩奧爾養傷，馬斯真蘭奴韌帶受創未知趕唔趕得切復出，尋日西班牙《體育報》仲話布斯基斯鼠蹊有傷硬頂咗1個月，捱唔住嘅話可能要桑治頂上。事實上西班牙傳媒幫巴塞計數，佢哋今季各項賽事失咗62球，係近5年防線最差嘅一季，相比10/11球季62場失39球（平均每場失0.62球），今季踢54場勁失62球（平均每場失1.1球），可以話防守就係巴塞嘅致命傷！
拜仁雙塔高空轟炸

拜仁近期猛放炸彈，馬里奧高美斯嘅高空轟炸上場已經令巴塞頂唔住，今晚復出嘅文迪蘇傑又係「空中霸王」，單係呢招高空攻勢都夠炸散巴塞防線。仲有，教頭軒歷基斯曾經教過畢爾包、特內里費同皇家馬德里等西甲球隊，對西班牙波好熟，上季喺歐聯4強佢亦都帶隊淘汰過皇馬啦！依家有4球在手，大把本錢同巴塞鬥瀟灑，唔怪得佢仲話要打攻勢足球，球迷今晚等睇多次入球騷啦！

首回合：巴客負0:4
魯營例劏德甲兵

‧歐聯史上暫無球隊喺淘汰賽首回合淨吞4蛋後仍然可以晉級。

‧巴塞隆拿今屆歐聯5仗主場賽事都保持不敗。

‧巴塞近10次主場迎戰德甲球隊獲得全勝。
球王回勇撐埋主W

巴塞隆拿喺今屆歐聯作客戰績差強人意，6仗當中有4場贏唔到，不過返到主場就獲得3勝2和，證明魯營威力確係非同小可！最重要係美斯喺上場聯賽對畢爾包取得入球，狀態回勇，肯定唔會出現首回合「行行企企」嘅情況，就算條防線頂唔住拜仁反擊，但前場都有力數幾粒贏番鋪，主W有1.73倍，諗得過！
頂占筍盤：巴塞隆拿（入球大）