倫敦雙雄分途衝刺爭踢歐聯

猪拉多纳

英超曼市雙雄霸住頭兩位，餘下兩張歐聯入場券由倫敦三雄爭崩頭，北倫敦雙雄今晚分途出擊，熱刺主場迎戰修咸頓，阿仙奴就作客昆士柏流浪，去到最後直路場場肉搏戰，好睇過戲！
熱刺搶Ｗ同聖人大晒冷

先講熱刺對修咸頓，主隊必以三分為目標，隊內王牌球星加里夫巴利傷愈後腳風仍順，今戰將繼續強攻對手。「聖人」由普捷天奴接手後夠膽同強隊鬥攻，結合本季作客英超Top 6球隊全大靚績，大盤屬投X首選！

（有線301及201台周六晚10時直播）

熱刺目前落後第四位阿仙奴兩分，但踢少場，由於第三位車路士今輪硬撼一哥曼聯隨時會失分，佢哋要把握機會重返前四。熱刺今季基本上齋踢一個加里夫巴利，本來咁樣唔多健康，但呢位新鮮出爐嘅英格蘭雙料足球先生長期交到貨，傷愈復出後連續兩場有士哥！熱刺右翼艾朗連儂好番，加里夫巴利唔使固定喺右邊搵食，可以踢得更自由，有埋把握力強嘅射手迪科爾喺前線攻堅，要撕破對手防線絕非難事。
修咸頓作客Top 6全大

修咸頓上仗主場罕有失準淨吞西布朗三蛋，更有左閘丹尼爾霍斯及進攻中場加斯頓拉美利斯領紅，今仗兩人雙雙停賽。不過，「聖人」自從一月由普天捷奴接手後，好夠膽同強隊鬥攻，喺主場贏過曼城、利物浦同車路士，淨係試過作客僅敗於曼聯，幾場波都開大，反映班波遇強唔會齋守。大軍擁有當弗箭頭積洛迪古斯，仲有頂得之人列基林拔攻堅，有唔少取分點，唔易對付。

熱刺已經連開六口大，對上十二戰十一場開大；修咸頓今季五次作客英超Top 6球隊全數開大盤，場場都有士哥，唔係任人魚肉，再追大盤。
修咸頓作客Top6大績

日期 賽果

31/01/2013 負曼聯1:2

17/01/2013 和車路士2:2

29/09/2012 負愛華頓1:3

15/09/2012 負阿仙奴1:6

19/08/2012 負曼城2:3