阿仙奴搏命勢炒QPR

猪拉多纳

阿仙奴出戰倫敦打吡，作客昆士柏流浪（QPR），兵工廠領先第五位熱刺兩分但踢多一場，想力保前四除咗要力爭餘下三仗全勝，仲要寄望熱刺失分，形勢較為被動。嚟到最後大直路，最重要做好自己，全力衝刺贏到盡。昆士柏流浪已篤定降班，面臨主力四散危機，軍心崩潰之下，隨時輸鑊甘，「讓球客勝」有2.05倍抵玩。

（有線300及200台周日凌晨零時30分直播）

阿仙奴多年冇盃捧，早已令球迷怨聲載道，唯一可以向fans交代，就係打入聯賽前四參加歐聯，如果咁都做唔到，真係要搵窿捐，所以球隊現時決心極強。兵工廠鬥中下游球隊，把握力十足，近期都能夠以兩球或以上距離，擊敗史雲斯、雷丁及諾域治，更何況今場對手只係篤定降班嘅昆士柏流浪。

兵工廠射手基奧特繼續停賽，幸好禾確特、普多斯基等中前場球員表現不俗，甚至連「玻璃人」路斯基都翻生，要撕開昆士柏防線，並唔困難。
昆士柏降班星散冇鬥心

昆士柏流浪下季降落英冠，收入大減之下，留唔住一班高薪主力。英國傳媒早前指起碼十人離隊，包括雷米、泰拉拔、格尼路、羅拔格連、贊拿斯、麥比亞等。加上領隊夏利列納曾批評呢班正選人腳缺乏鬥心，將帥關係欠佳，睇怕佢哋依家已掛住跳槽，根本唔會再為球隊搏命，淨輸兩球好正路。