皇馬大騷冧粉絲

猪拉多纳

借華拉度列發洩歐聯冤屈氣

今晚西甲皇家馬德里主場對華拉度列，「銀河艦隊」剛喺歐聯贏波出局，眾將踢到力疲心傷，認真悲壯，依家得番西盃可爭，主帥莫連奴今仗可疊埋心水派多啲副選出戰，冇乜心理包袱下，預計會同無欲無求嘅華拉度列合演入球騷，大細中位數3.5球，照捧大盤。

（now 632周日凌晨2時直播）

周中歐聯四強次回合，皇馬雖淨勝多蒙特兩粒，但總比數仍輸3比4黯然出局，主力如C朗、沙治奧拉莫斯等搏到甩轆，「沙拉」更撞傷右腳，今仗肯定倦勤。由於主帥莫連奴離隊甚囂塵土，「銀河艦隊」勢被解體，《阿斯報》更列出卡卡、希古恩、莫迪歷、沙比阿朗素等12人清洗名單，空穴來風未必無因，內部士氣唔慌好得去邊。
阻止巴塞提早封王

如果皇馬今場贏唔到華拉度列，巴塞在周一凌晨擊敗貝迪斯嘅話，便可提前四輪封王，莫連奴當然唔想呢一幕出現，但巴塞奪標只係時間問題，況且皇馬月中仲有場更重要嘅西盃決賽硬撼同市死敵馬體會，一向以目標為本嘅莫帥，點會唔識計呢條數呢？預計佢今仗會讓部分主力休息，起用卡卡、比比、艾華路莫拉達等副選，以輕鬆心情迎敵。

對手華拉度列幾近上岸，近八仗僅得一勝，Hea踢情況明顯，不過中場艾拔傷愈後，令球隊有番邊路側擊力，加上華拉度列作客巴拿貝經常出現大手交易，雙方放開懷抱下鬥攻，入波一定多，就算大細中位數調至3.5球，1.7倍嘅大盤亦值得捧場。