熱刺主場醒喪炒修咸頓

猪拉多纳

巴利領軍誓搶歐聯入場券

「三料先生」加里夫巴利領軍，熱刺誓搶歐聯入場券！熱刺今晚喺白鹿徑迎戰修咸頓，喺英超尚餘3至4輪情況下，頭4位競爭一如過往激烈，相信未到最後一輪都難分勝負。熱刺依家暫列第5，少第4位嘅阿仙奴2分但踢少1場，只要贏晒餘下賽事，歐聯入場券就會到手，真係諗唔到唔支持熱刺嘅理由，一於撐2.25倍「讓主」加1.57倍「入球大」！

（有線201及301、廣東體育周六晚10:00直播）
迪科爾 丹普西腳風順

熱刺主場向來醒神，雖然早前對富咸意外落敗，但係最近以3:1擊敗曼城，可見白鹿徑威力仍在。球隊後防近期表現不濟，近6場加埋失咗10球，好在前線無論係迪科爾抑或艾迪巴約，近期都係士哥頻頻，加埋腳風甚順嘅丹普西，難怪近6場每仗最少入兩球，一於後面失幾多前面入番幾多。

不過講到犀利，當今英超都冇邊個夠加里夫巴利勁，呢位威爾斯國腳早前連奪英格蘭球員先生、最佳青年球員同英格蘭足球先生3大獎項，連施丹都讚佢係「物有所值」，叫皇馬高價撬佢過檔！熱刺有加里夫巴利孭飛士氣高昂，首循環作客都贏修咸頓兩粒，今晚隨時係一場大勝。

「聖人」修咸頓現時位列13，雖然仲未上岸，不過早排接連擊敗利物浦同車路士搶分成功，護級壓力經已大減。上仗主場畀西布朗大炒3球，相信士氣應該會減弱，唔好忘記作客係修咸頓嘅死穴，今季17戰錄得3勝6和8負，睇怕要喺白鹿徑搶分機會唔大。不過陣中有積洛迪古斯同列基林拔等狀態唔錯嘅攻擊球員，相信有力破蛋！
熱刺快入局半場旺大

熱刺近17次主場僅1敗。

主隊近8戰有7場開出入球大，5戰開出半場入球大。

修咸頓近6次作客白鹿徑，僅錄得1勝。
首球撐「英足先生」巴利仔

嚟到季尾，希望盡力爭番個歐聯席位嘅熱刺愈戰愈勇，加埋新科英格蘭足球先生加里夫巴利復出後狀態已經慢慢回復到受傷前嘅水平，上場仲有「士哥」，今場肯定係修咸頓嘅心腹大患呀！睇番全季，呢位英足先生總共攻入咗19個聯賽入球，其中更有6個係首名入球，呢位「大紅人」嘅首球有3.5倍，絕對抵捧呀！