曼城衞冕失敗衰在冇鋒力

猪拉多纳

要成功衞冕英超冠軍確實係件難事，歷史上只有曼聯同車路士能夠做到，曼城目前顯然仲未有衞冕嘅實力，今季佢哋失敗嘅關鍵，係對弱旅嗰陣嘅表現缺乏說服力，鋒力時好時壞亦係主因之一，今晚作客對住「古惑兵團」史雲斯，隨時又陷於苦戰。

曼城今季喺一啲實力遠勝對手兼且佔盡優勢嘅比賽，拉唔開比數不特止，有時仲輸埋添，好似客場對新特蘭、修咸頓同昆士柏流浪呢3場波，就合共失咗8分咁多，反而曼聯就攞足9分，一來一回，曼城梗係冇運行啦！比起上季場均入2.45球，曼城今季嘅平均入球只係1.78球，前鋒狀態下滑，進攻節奏過慢，反擊效率低，阿古路又成日受傷，搞到作客贏波率唔夠5成！

對家史雲斯上季試過砌低「藍月亮」，今季佢哋雖然一早上咗岸唔使護級，但班「天鵝球員」為咗力爭表現，來季轉踢大球會，今鋪一定當曼城係仇人咁砌！