紅牛孖寶「倫」流發威

猪拉多纳

周末賽事尾輪都係以美職（MLS）為主，咪以為MLS冇咗碧咸就冇晒睇頭，查實一樣有唔少球隊係臥虎藏龍，實力唔嘢小。好似目前排喺東岸第3位嘅紐約紅牛咁，陣中有2名前英超球星亨利同卡希爾壓陣，整體實力絕對喺東岸第5位嘅哥倫布機員之上，（六）49個2.85倍客勝抵玩o架！
衝擊迪華奧射爆聖荷西

咪以為亨利同卡希爾一把年紀就冇料到，查實佢哋都係寶刀未老，上仗紅牛就係靠卡希爾梅開二度贏咗FC多倫多，前仗亦喺亨利取得「士哥」下，以4:1做低新英倫革命。更令力奇放心嘅，係紅牛今晚仲有前巴西罰球王P祖連奴坐完2場波監復出，大把進攻籌碼喺手，要贏波攞3分又有幾難。

同日另一場賽事，「東岸一哥」蒙特利爾衝擊今晚會造訪聖荷西地震，衝擊嘅意大利老將射手迪華奧今季同樣老而彌堅，至今入咗4球排射手榜第4，合共累積16次射門中框更加係美職No1，有佢孭飛出擊，肯定可以打到聖荷西有得震、冇得瞓，一於要埋衝擊客勝。