巴塞炒貝迪斯氹球迷

猪拉多纳

「地上最強」開奪冠不夜P？今晚西甲巴塞隆拿主場迎戰貝迪斯，雖然上周中歐聯4強慘遭德甲班霸拜仁羞辱，但更加激發巴塞眾將交代之心，王牌美斯可能會踢半場，加上巴塞今仗若然贏波，隨時捧走聯賽錦標，並可為歐聯失敗遮遮醜，戰意必堅，「讓球主客和」巴塞讓兩球，斯維強捧「讓球主勝」。

（now 632周一凌晨3時直播）

上周中歐聯4強次回合巴塞喺主場淨吞拜仁三蛋，總比數輸夠七粒出局，主帥維蘭路華唔單止讓傷愈嘅美斯全場坐冷板，落後之下先後換出中場核心沙維同恩尼斯達，提早扯白旗認真無恥。不過話分兩頭，輸一球係輸，輸十粒又係輸，況且首回合已經落後四球，搏嚟都無謂，留番啖氣踢好之後嘅賽事好過喇，你可以話維帥太現實，但咁做更有利佢哋備戰對貝迪斯。
美斯後備踢半場

當然，堂堂「地上最強」對拜仁輸得咁慘，丟人現眼，成班贏慣威慣嘅球星應該感到羞恥，點都要做番啲嘢向粉絲交代，最好方法梗係捧番個冠軍「轉移視線」喇。睇番聯賽形勢，只要次席嘅皇馬今輪對華拉度列失分，而巴塞擊敗貝迪斯的話，後者便可提前四輪於聯賽封王。據《世界體育報》披露，巴塞射手美斯今仗應可踢到半場，隨時後備落場表演一個扭幾個嘅神奇入波添。

貝迪斯雖要為下屆歐霸入場券而努力，然而「綠白軍」近三仗不勝之餘，中場主力拿祖同荷西簡拿斯今仗仲要坐波監，守將保拿奧亦因傷倦勤，實力大削下好難惡得出樣，況且貝迪斯近年作客魯營四次全部輸晒，就算「讓球主客和」巴塞讓到兩球都冇有怕，照捧「讓球主勝」兼預祝佢哋提早捧盃。