驪龍轉場開勝門

猪拉多纳

　　上日賽事，幾個前領倉口俱食白果，方嘉柏連場搏殺，可惜搏極得個P；蔡約翰僅靠「桃花心」入位；最弊的是葉楚航，五路興兵盡鎩羽。照睇方、蔡、葉經歷連日拼搏，旗下馬匹漸無以為繼，大家追捧這三倉之馬，除非有理想賠率搭夠，否則短期內還是忍手為宜。

　　另一邊廂，沉寂多時的大摩終於發威，剛戰連捧兩盃，另憑「風花雪月」食尾胡，同場廐侶「卡達聖」更入Q，可謂連汁都撈埋。大摩窺準對手回氣，即出奇不意來招黃雀在後，可期攻勢不會一鋪玩完，各位且走着瞧！

　　明晚第七場的「經濟達人」失落打吡，皆因2000米路程嫌長，兼且本身進度未足，惟有歎句無可奈何。但看牠季內初出一役，跑谷草1650米排十二檔，劣勢下也得第四，走勢令人刮目相看。事實證明，此駒腳法啱跑窄場，有了一回渡江經驗，今仗理應有更佳發揮，加上排黃金一檔，隨時可捧走法國賽馬會盃。

　　再講尾場「驪龍」，擅泥形象深入民心，但觀乎血統，草地照計一樣掂。谷草場地向來較田草鬆軟，性質與泥地相似，今番轉場小心突如其來打開勝門！