熱刺巴利神勇煞車

猪拉多纳

歐聯撲飛關鍵6分波

英超爆發倫敦打吡暨歐聯席位爭奪戰，車路士主場惡戰熱刺，熱刺季尾靠當紅炸子雞加里夫巴利單天保至尊，佢哋目前落後第三位車仔3分，今場係全季最關鍵嘅6分波，深信呢個左腳王仍然有貨交。蘇豪上次撐車仔頂住曼聯，因為貪佢哋鬥志好，經過一場硬仗後，今次對住同樣戰意鮮明嘅熱刺難讓波，要「讓球客勝」！

(有線200及300台周四凌晨2時45分直播)

熱刺去到季尾踢成點？個人認為只係一般，上輪主場對修咸頓老鼠拉龜，勁唔對辦，不過，佢哋勝在有個「準球王級」巨星加里夫巴利撐住，佢近三戰場場有士哥，上場又喺尾段射個世界波幫球隊攞晒3分，真係犀飛利！加里夫巴利狀態唔及季中勇銳，但去到關鍵時刻總能夠挺身而出，今戰大軍中場大佬柏加要養傷，另一主力迪比利亦有傷未必踢得，進攻重任再次落喺呢位威爾斯球星身上，佢絕對有力再做英雄！
車路士兵疲好蝕章

車路士上場作客曼聯取得重要勝仗，踢到尾段仍然搶攻爭勝，真係贏在鬥志好。車仔現時士氣冇得彈，但去到季尾體能狀態係非常重要嘅因素，今場係佢哋不足個半月以來第12戰，平均約三日打一場，無論班兵點弗都好，點都會有多少疲態，遇着成日喺尾段發威嘅加里夫巴利相當危險！車路士進攻中場夏薩特受傷缺陣，創造力要打折扣，其餘主將都可候命，巴西球星大衞雷斯近期攻守都搶鏡，今戰仍屬焦點人物。

兩支倫敦球會喺呢場關鍵6分波同樣唔想輸，熱刺暫時落後3分，心態上會更進取，主帥保亞斯倒戈出戰，決心喺舊主車路士球迷面前威番鋪，佢哋有大紅人加里夫巴利壓陣，絕對不落下風，受讓捧得過！
吼實和波膽0:0、1:1

熱刺對上一次作客史丹福橋贏波已經係89/09年球季，當時英超仲未成立，頂級聯賽仲係叫英甲。如果由92/93首季起計，熱刺過去20次英超作客車路士成績為7和13負，當中7次和波比數唔係「0:0」就係「1:1」，如果以中位數計2.5球計，20次交手共開出8大12細。

球季 賽果(半場)

11/12 和0:0(0:0)

10/11 負1:2(1:1)

09/10 負0:3(0:1)

08/09 和1:1(1:1)

07/08 負0:2(0:1)

06/07 負0:1(0:0)

05/06 負1:2(1:1)

球季 賽果(半場)

04/05 和0:0(0:0)

03/04 負2:4(1:2)

02/03 和1:1(1:1)

01/02 負0:4(0:1)

00/01 負0:3(0:2)

99/00 負0:1(0:0)

98/99 負0:2(0:0)

球季 賽果(半場)

97/98 負0:2(0:0)

96/97 負1:3(1:1)

95/96 和0:0(0:0)

94/95 和1:1(1:0)

93/94 負3:4(2:3)

92/93 和1:1(1:0)