英總專家曼城 再創豐功「韋」績

猪拉多纳

撐曼城捧盃攞安慰獎！「億萬大軍」今晚喺足總盃決賽同韋根會師溫布萊，合演終極王者戰，曼城領隊文仙尼喺周中英超半力出擊，無非都係想留力打殘韋根，爭取成為歷來首位兩奪足總盃嘅意大利籍主帥，況且韋根天殘地缺兼有護級後顧，1.83倍「讓主」走唔甩！

（now635台及廣東體育周日凌晨0:15直播）

曼城前年勇奪足總盃結束35年錦標荒，領隊文仙尼隨即畀Fans當正神咁拜，但隨住今季晨早就喺英超向宿敵曼聯俯首稱臣，文帥想繼續有碇企嘅話，當然希望再靠足總盃食胡，齋睇「藍月亮」今屆5戰只失1球嘅表現，就證明佢哋踢英總特別醒神。

文仙尼為捧盃嚴陣以待，周中贏西布朗1:0場英超就派半力出擊，高柏尼、薩巴列達、基捷基治、阿古路同大衞施華等主將統統留力砌韋根，最重要係耶耶托尼嘅小腿傷患冇乜大礙，今仗可以披甲，淨計人腳，都贏韋根幾條街啦！
韋根分心護級 4守將打柴

查實兩軍喺4月中英超交手，主場嘅曼城一度處於劣勢，幾經辛苦先贏1:0，正正因為咁，所以隊長高柏尼已經呼籲隊友咪再輕敵，占士米拿亦話要捧盃彌補衞冕英超失敗嘅遺憾，鬥志爆晒燈！

再講，曼城已經獲得來屆歐聯參賽資格，未來兩輪英超攞多1分就可以奠定次席位置，反觀創會以嚟首度躋身足總盃決賽嘅韋根，目前仲滯留聯賽榜尾3，主席韋倫前晚受訪嗰陣亦都承認，如果畀佢揀的話，佢寧願留級多過捧盃，老細都講到咁白，韋根今晚會唔會砌盡已經難估，加上佢哋又有拉米斯、美羅費古羅亞、朗尼史譚同艾卡拉斯等大堆防守球員倦勤，點頂得住猛虎出柙嘅阿古路呀？
曼城近7次交手全勝

‧雙方近7次交手曼城贏晒，總共入13球並且1球不失。

‧曼城對上一次輸畀韋根，已經係08年9月嘅事。

‧韋根最近連開3口大。
英總賽制

決賽於中立場溫布萊舉行，法定時間內打和加時30分鐘，未分勝負則互射12碼決定冠軍。