留力西盃出二線兵 皇馬「愛」唔過

猪拉多纳

差不多一個月前，已經話皇家馬德里一旦失分，就會造就巴塞隆拿提早封王，結果「銀河艦隊」遲遲未Certify，更連贏6場西甲，不過今晚作客愛斯賓奴，似乎係時候斷氣，2.6倍「讓球主勝」係投X首選。

（now632台周日凌晨4:00直播）
愛斯賓奴主場硬淨

由於「銀河艦隊」近期大踢開放足球，長追入球大似乎冇衰，周中特別場就以6:2大炒馬拉加，但今場入球大細中位數卻維持2.5球，搞到個大得1.45倍，推介畀大家都唔好意思啦。

皇馬今戰其實比起早前幾場聯賽略為不同，畢竟係西班牙盃決賽前最後一役，教頭莫連奴未必會派最強陣容應戰，最緊要係奧斯爾喺上場勇戰受傷，雖然有望喺下場生死戰復出，但今戰就唔使預佢，為免增添更多不必要傷兵，今仗保守係在所難免。事實上，皇馬連賽前記招都取消埋，根本當場波冇到，就知佢哋嘅心態。對手愛斯賓奴雖然經歷聯賽兩連敗，但對上10次主場就有9戰未輸過，面對今季作客表現長期唔穩定嘅皇馬，受讓值得捧場。
拉科7戰不敗受讓筍

講埋華拉度列主場對拉科魯尼亞場波，排13位護級壓力唔大嘅主隊，今場有中場祖利安奧馬停賽，前鋒丹尼爾拿臣又話倦勤，鬥志麻麻似乎信唔過。排尾3嘅拉科近況回勇已連續7場聯賽不敗，氣勢如虹，加上仲有中場阿古拿同碧斯波監刑滿復出，陣容完整，家陣華拉度列仲要讓平半，唔貪心要1.78倍下盤！

（開賽時間：周日凌晨 0:00）
足球重心：愛斯賓奴（讓球主勝）、拉科魯尼亞（下盤）

馬膽推介：1場（8）奇無極

上場轉彎時片咗出去，竟然都可以由頭放到落尾，擊退剛於周三贏馬嘅「好精伶」，馬房爭緊冠軍肯定再搏。