QPR等散班撐紐卞素

猪拉多纳

馬來西亞大選，執政黨明目張膽舞弊，空運票箱、熄燈變票、外勞鐵票……嗰晚，幾乎全馬國人民都喊。小妹一位馬來西亞朋友，話好羨慕香港有一個廉潔可靠嘅政府，小妹笑而不語。小妹只係話佢知，齋喊冇用，要喺不公義政權度爭取民主，就一定要上街、抗爭，可惜個馬國朋友咁樣答我：「算喇，我唔得閒呀，我唔出都有大把人企出嚟啦！」
紐卡素仲要搶分護級

呢種人比比皆是。好似小妹間公司咁，朋友A個廣告部有手足離職，早兩日佢同我呻，話佢同事竟然視若無睹，連續幾次1星期放3日假，點解呢？因為有人抵得諗，粒聲唔出一個禮拜放一日就人囉！都算啦，到阿A忍唔住開聲，但竟然換嚟黑面回應、反嬲阿A，話阿A唔應該咁喎！小妹聽完真係堅嬲，小妹亦唔係聖人，只係覺得無論點都好，一定要切身處地諗吓人哋，若然個個都咁自私，有事等人企出嚟、冇事就話之你死，間公司會變成點？香港又會變成點？

英超昆士柏流浪嗰班所謂球星，同小妹公司廣告部啲人一樣，淨係識諗自己，早喺QPR未宣布降班前，一眾球星都已經搵定後路，家陣鐵定來季英冠見，呢班「打工皇帝」又點會同你搏呀？日前中場麥比亞仲衰到喺twitter話想返馬賽踢波，個個都等跳船，難怪QPR近4戰0入球啦！相反，紐卡素仲未上岸，眾將齊心搏命，今鋪作客3分走唔甩，撐2.1倍客W！
推介：紐卡素（客勝）

夏天、美腿>.<

近排天氣愈嚟愈熱，小妹終於開始feel到炎夏將至，正所謂「夏天，為大地帶嚟美腿」，睇怕小妹同Best Fd阿Shan，要一齊進行地獄式Keep弗先得喇！