里昂搶分保「3」唔驚PSG

猪拉多纳

法甲今晚上演前列大戰，由里昂主場硬撼巴黎聖日耳門，季尾波不嬲鬥志行先，里昂仲要為來屆歐聯參賽資格努力，對住中後場穿晒大窿嘅巴黎聖日耳門隨時有計，主場受讓平半梗係撐下盤啦！

（開賽時間：周一凌晨3:00）
聖日耳門迷失跌Watt

PSG攞聯賽冠軍已經冇乜懸念，反而來屆歐聯入場券仲要爭餐懵，里昂目前只係領先第4位嘅尼斯3分，個「三哥」位一啲都唔穩陣。今晚主場鬥聖日耳門睇落係硬仗，實情係黃金搶分良機，事關對家教頭安察洛堤一直盛傳會喺今日賽後宣布過檔皇馬，聖日耳門中堅阿歷士洛里高前日喺記招爆料，話「肥安」前途未卜，令一班手足開始對來季前景好迷失，難怪隊波近期表現跌跌哋Watt，前仗小勝下游嘅伊維恩一粒，上仗仲失埋分畀華倫西恩斯添。

係，里昂已經唔係早幾年橫行霸道嗰隊班霸，今季表現仲幾海鮮添，但嚟到季尾戰績明顯穩步上揚，最近4場聯賽錄得3勝1和，當中連出名主場夠晒惡嘅蒙彼利埃都砌得低，個勢咁猛冇理由仲走去作對啫。況且以巴菲迪比高美斯同哥古夫領銜嘅攻擊組合最近着晒火，佢兩個近兩仗就合力炮製咗4個士哥，今晚對住有中場馬高華拉堤、中堅堤亞高施華同門將沙華托尼施利古坐波監嘅聖日耳門，絕對有機會乘虛而入。