韋根大鬧兵工廠

猪拉多纳

足總盃盟主聯賽保命戰

新鮮出爐嘅足總盃盟主韋根今輪喺生死關鍵戰作客硬撼阿仙奴，韋根啱啱創造足總盃史上其中一場經典以弱勝強傳奇戰役，但餘下兩場聯賽要全勝先可以留喺英超，今戰必要以3分為目標，冇得唔攻！「兵工廠」亦需贏波保住歐聯席位爭奪戰主動權，呢場係鬥攻格局，半場大同大盤可雙投！

（有線300及200台周三凌晨2時45分直播）

韋根喺足總盃王者戰被全面睇淡，最終憑奇兵賓屈臣尾段建功絕殺勁旅曼城，呢場勝仗為球員注入信念，令佢哋相信球隊有能力戰勝任何一支英超勁旅。

事實上，韋根季尾長期保持高水平發揮，前面進攻鐵三角干尼、馬隆尼同卡林麥馬拿文個個都弗，麥馬拿文更被視為超級新星，前途無可限量。大軍硬撼曼城付出唔少體力，但佢哋目前落後尾四新特蘭4分，球差少11球，餘下兩戰1勝1和都唔夠數，必須贏晒先有望逃出生天，今戰必定毫無保留搏盡。
阿仙奴爭玩歐聯唔會縮

另一邊廂阿仙奴正力爭歐聯席位，佢哋落後第三位車路士5分，比起第四位熱刺少2分，但有一場波在手，只要今戰贏波就可騎住熱刺重奪主動權。

「兵工廠」射手基奧特今戰需坐波監，但前線禾確特回勇連續兩場有士哥，加上普多斯基及辛迪卡索拉等人支援，進攻火力仍然強勁。阿仙奴首循環作客韋根僅憑阿迪達射入12碼一箭定江山，贏得抆水，佢哋上季更於主場1比2不敵韋根，家陣兩隊都要搶分，一開波就會鍊盡，大盤可熱食，2.02倍半場大亦博得過！