FC北京16強追殺首爾

猪拉多纳

中超兵克服「恐韓症」

亞冠盃16強爆發中韓首都對決，中國代表FC北京首回合主場迎戰南韓球隊FC首爾，今屆16強改踢兩回合，北京今年治愈「恐韓症」，由星級射手簡路迪領軍，勢必搶頭胡，鬥志一流。首爾質高但作客唔叻，平手盤撐北京！

(now 670周二晚7時30分直播)
簡路迪邵佳一夠卡士

亞冠盃十六強以往一場過決勝負，分組賽首名晉級隊伍可獲主場之利，今屆改踢兩回合，首名晉級球隊只獲「先客後主」之利，正路好多。北京首回合主場出擊，當然想保持不失唔畀首爾取得作客入球，但要頂住首爾黑山射手丹恩奴域難度太高，與其坐以待斃，不如積極爭取入波。北京前線擁有馬里老牌射手簡路迪，仲有罰球專家邵佳一支援，踢法簡單直接，有力爭取「士哥」。

中國球隊不嬲都好怕遇上南韓球隊，皆因佢哋體力、速度同技術瓣瓣輸，不過，近年中超水平不斷冒升，兩國球隊差距逐漸拉近。北京曾經患上「恐韓症」，2010年亞冠盃十六強就係不敵南韓代表水原藍翼，但大軍今屆分組賽兩戰韓職實力分子浦項制鐵一勝一和，包括喺第五輪關鍵決戰主場砌低對手，顯示佢哋對住南韓球隊唔再畏首畏尾，今次主場迎擊首爾有條件贏埋。
首爾作客無厘神氣

論級數FC首爾必在北京之上，大軍勝在進攻火力強，前線黑山神鋒丹恩奴域級數超班，仲有個星級中場梅里斯奧摩連拿助陣，不過，呢個哥倫比亞指揮官今季受傷患困擾，發揮只係麻麻，成班波現時不在最佳狀態。首爾分組賽作客三戰僅一勝，贏嘅對手只係中超最弱代表FC江蘇，贏來冇乜說服力，佢哋作客泰國代表武里南聯都冇甜頭，今次去到北京惡唔出樣。