好精神分量十足

猪拉多纳

　　今日可能有雨，場地狀況未詳，不過，谷草B欄賽事，唔信邪唔得，通常唔利追，如果場地慢，可能更加惡劣，後上馬非有較強變化地性能不可。由於局勢唔明朗，唔建議大賭，除非場地正常，則有唔同諗法。總之，排好檔馬匹，都可以睇高一線。

　　第二場四班1200米。「勁感」跑落好似係咁多，未贏到，但又未曾跌出前四名，高伯新一直冇安排此馬轉戰沙田，好明顯佢知道呢匹馬場地性能唔多廣泛，長直路或者唔啱。搏完上場之後，一如上賽之前，有足夠休息期，杜利萊未放手，應該係配合今晚高廐攻勢而來。

　　第六場三班1200米。揀「好精神」做膽時，望望賠率，有冇搞錯，獨贏唔夠4倍，以為眼花！小將執韁隔晚賣到咁熱，嫌棄與否因人而異，亦可視作墊底知心飛。

　　講到隻馬能力，之前識得贏，上場可上名，三班此程唔係冇地位，用得十磅仔，減輕負荷，如意算盤唔知打唔打得響，如果1檔甚有幫助，細路仔又舞得掂的話，唔係冇資格贏。

　　紅衣叻叻前速可靠

　　第七場二班1000米。「紅衣叻叻」處身1場快馬唔少場合，數數便有「先鞭直前」、「沙紙」、「加州金獎」、「勁有盈」等，連同佢在內，可能有半數賽駒搶放，勝在自己排1檔，本身前速可靠，唔難自己帶頭，乘着慢地，有機會由頭放到尾。
點買法

　　

　　「好精神」係全晚最佳獨贏心水，不過，今晚賠率如果唔回番啲，仍然3倍左右，博唔博？未必囉。而QT重心放埋同一場，配腳揀幾匹輕磅馬，因為部分跑法上有利。