威武飛駒乘勝追擊

猪拉多纳

　　文廐「威武飛駒」上仗跑谷草1200米，最終在薛寶力胯下爆42倍大冷打開今季勝門，只見牠全程快放姿態輕鬆，證明實力不簡單；據悉上仗其狀態僅屬初起，馬房方面信心一般，難怪賠率如此冷落。此駒勝後操練更為積極，成熟程度及狀態均更上一層樓，今次乘勇再來兼抽得一檔好位，形勢相當理想，預料可再次於薛寶力胯下放返，最適合做膽。

　　同場有實力一拼的是「大哥哥」，以往此駒口勁甚重，易放難留，今次初配貝湯美出賽，據知這位澳洲好手臂力驚人，留放亦好，要作配。此外，「金滿載」腳患好轉，埋門操得食得，路合配強可爭一席。

　　潘頓揀騎善寳

　　另一方面，潘頓為爭冠軍自然盡拼，今戰胯下亦有不少實力坐騎，最值得睇好的是第七場的「善寳」。此駒埋門谷至火紅火綠，毛色靚，肌膚更呈胭脂紅，灰馬有此情況乃大勇表現，而潘頓棄騎方廐「威威具星」應有見地，馬膽不作他想。

　　「加州金獎」速度飛快，賽前更於谷閘直領到底，走勢一氣呵成，可見場地性能已試準；此駒幕後戰意鮮明，有力贏馬兼捧盃，乃「善寳」心腹大患。「沙紙」及「紅衣叻叻」均擅跑谷草1000米，皆要兼顧。