納比收晒料FC廣州撲殺水手

猪拉多纳

今晚亞冠盃16強首回合好戲連場，中超班霸FC廣州（廣州恒大）作客澳職總冠軍中岸水手，賽前曾踢過英超嘅中岸水手防中尼基蒙哥馬利大言不慚，話唔知FC廣州嘅星級射手達里奧干卡（孔卡）係乜水，勢必激起客軍嘅爭勝決心，加上名帥納比特登搵依家喺澳職搵食嘅迪比亞路收料，備戰充足，今仗小讓平半非常值博。

（廣東體育頻道周三下午5時30分直播）
迪比亞路指路明燈

雖然貴為澳職總冠軍，但中岸水手今屆喺亞冠表現唔算突出，之前分組賽尾輪若非中超球隊FC貴州失分都未必出到線。賽前被安排要盯死FC廣州殺手達里奧干卡嘅防中尼基蒙哥馬利非常不屑：「達里奧干卡？佢個名我聽都未聽過，同一位年薪超過1,000萬美元嘅球員交手，感覺好得意，如果喺訓練個陣講呢件事，大家都認為呢個係笑話。」其實水手仲拖欠尼基蒙哥馬利幾個月人工，呢位蘇格蘭老將咁樣講，明顯係妒忌FC廣州疊水喇。

憎人富貴厭人窮係你嘅事，FC廣州確係有料到，班主許家印入主時講過五年內要奪得亞冠，今年已經係第四年，眾將唔敢將老闆說話當耳邊風。自FC廣州上季成為中超雙冠王後，已經擸晒國內所有錦標，今屆將目光放在亞冠亦理所當然。FC廣州嘅意大利名帥納比備戰時特登打電話畀教祖雲達斯時嘅愛徒、現効力FC悉尼嘅迪比亞路收風，希望了解更多有關中岸水手嘅虛實，仲話已經搵到對方嘅弱點。若然FC廣州能夠奪標，派發嘅獎金隨時過1億元人民幣，眾將為名為利一定搏甩髀，上盤有2倍有買趁早。
韓日大戰撐柏雷素爾

另一場16強首回合上演「韓日大戰」，南韓勁旅全北汽車主場硬撼日本球隊柏雷素爾，主隊今屆踢法保守，嚟到淘汰賽必踢得更加謹慎，柏雷素爾三連勝表現sharp醒，有力反客為主，柏軍「+1」咪走寶。

（now 671周三晚6時直播）