皇馬「孤兒仔」打沈馬體會

猪拉多纳

打吡10連勝 「剋星」C朗搶盃

「皇馬孤兒仔」要爭氣！近日盛傳主帥莫連奴有心搞衰隊波博炒，不過小妹相信事在人為，皇家馬德里今晚喺巴拿貝同馬德里體育會合演西班牙盃打吡決賽，一班球星就算畀主帥遺棄慘變「孤兒仔」，仍然想砌低同市死敵捧盃以免今季四大皆空，一於直取2.15倍「讓主」啦！

（now632台周六凌晨3:30直播）
C朗8次射爆對手

皇馬將帥不和傳足成季，小妹覺得就算莫帥想「玩嘢」，一班球員絕對有能力同佢「對着幹」，唔畀佢輸波成功博炒嘅。先唔講馬體會近10次遇着「銀河艦隊」都輸波收場，C朗自09年加盟皇馬以嚟，已經攻破過死敵大門8次咁多，上季喺西甲作客嗰陣仲曾經上演過帽子戲法添！呢位「馬體會殺手」賽前更代表球隊揚言︰「我哋成隊都好期待今場比賽，好想贏！」擺明已經做好準備打爆對手捧盃，唔畀莫連奴嘅陰謀得逞。
馬體會遇艦隊腳軟

話就話法卡奧近6次上陣入咗6球，不過馬體會一對住皇馬就腳軟已經成為定律，佢哋今季氣勢咁好都喺西甲慘遭死敵「雙殺」，就知呢隊波仲未有能力破宿命啦！雖然話比比因為「作反」可能畀莫帥雪藏，但相信唔少主隊球迷都會同小妹一樣，睇佢喺歐聯對多蒙特嘅表現就覺得呢位「殺人王」唔出好過出！

查實沙治奧拉莫斯、艾比路亞同馬些路都已經復操可以上陣，就算華拉尼長抖，對防線影響相信唔會太大，呢場比賽仲要喺巴拿貝球場舉行，變相益晒皇馬有埋主場之利，要炒起馬體會捧盃，其實唔難吖！
皇馬主場9連勝

‧對上7屆西盃決賽，其中6屆於法定時間內分出勝負。

‧皇馬今季於巴拿貝出戰未輸過，目前保持9連勝。

‧雙方近10次對壘馬體會全數落敗。
往績贏晒熱捧皇馬主W

呢場既係西盃決賽，又係馬德里打吡，諗住踢落勢均力敵？未必，起碼數據唔係咁講！今場話就話中立場，實情喺皇馬嘅巴拿貝球場踢，須知道皇馬今季喺自己地頭30次出戰，25勝5和冇輸過，目前延續9連勝氣勢之餘，對住馬體會仲創下10連勝，往績咁一面倒，熱捧埋皇馬1.42倍主W啦！
決賽賽制

如法定時間內打和，將加時30分鐘，再和則以互射12碼決勝。