史浩克衝歐聯全國打氣

猪拉多纳

興兵弗賴堡 一戰定前途

德甲今晚煞科，當中以聯賽第四名，下屆歐聯外圍賽入場券嘅爭持最激烈，目前以51分排第五嘅弗賴堡主場對52分排第四嘅史浩克04，勝方有得踢歐聯，負方要踢歐霸，弗賴堡嘅巴德諾法體育場突然成為全德甲焦點，24,000張門票早已售罄，門票由原價卅多歐元炒貴十倍到三百多歐元，依然一票難求。不過全國上下都為德甲大局着想，今晚全力為史浩克打氣，黑柴亦相信史浩克可以憑質贏得呢場關鍵戰，客軍讓平半撐上盤。

（有線61及201台周六晚9時30分直播）

目前第四之爭形勢緊湊，今晚弗賴堡對史浩克勝方可得歐聯外圍賽入場券，若然和波，暫排第六嘅法蘭克福又以五球或以上嘅淨勝球擊敗禾夫斯堡，法蘭克福至有機會超越史浩克攞到第四名，換言之史浩克仍然處於主動地位。而且基於史浩克參戰歐聯，對德甲下屆喺歐洲戰場搶分更有利，絕大部分人希望史浩克爭氣。
達斯拿復出火力大增

史浩克近期原本喜事不斷，除看守教練贊斯基拿獲得兩年長約外，天才中場達斯拿亦剛同球會續約到2018年，只可惜上仗喺被一致看好下，主場不敵「神經刀」史特加，搞到今晚要踢生死戰，可幸嘅係達斯拿停賽期滿復出，上仗對史特加啱啱復出缺態嘅法芬經過一周操練後狀態料有所提升，法芬近年係弗賴堡剋星，近四次對賽三次為球隊建功，今晚球隊前線終於齊人，作客弗賴堡踢關鍵戰，有力憑質取勝。

弗賴堡今季能夠打入德國盃四強，又起碼穩奪來屆歐霸盃參賽權，季前目標已經超額完成，球隊季尾表現有所回落，較早前德國盃準決賽同聯賽打吡戰兩鬥史特加都輸，同陣中近半隊主力將會星散有關，近期兩連勝所贏嘅都係榜尾弱旅，不足為據，何況今仗中場大將兼主力攻擊手卡利古尼累積十面黃牌要停賽，戰鬥力削弱，有可能喺無奈下順應民意，將第四名讓畀史浩克。