賀芬咸未踢先認輸

猪拉多纳

除咗爭第四，德甲護級尚有懸念，包尾嘅格雷特霍夫肯定降班，但其餘三支榜末隊伍賀芬咸、奧格斯堡同杜塞爾多夫都要為護級最後一搏，當中以賀芬咸形勢最危，今晚作客面對上季冠軍兼死敵多蒙特非勝不可要焗攻，若然贏唔到就肯定降班，不過雙方向來牙齒痕極深，多蒙特嘅西法倫球場喺今晚呢場例行公事都晨早賣晒飛，八萬主隊球迷已經做好準備，齊齊慶祝死敵賀芬咸降班。

（有線64及203台周六晚9時30分直播）
作客多蒙特焗攻捧大盤

賀芬咸08年喺富豪班主霍普大灑金錢下，強勢殺上德甲，聯賽首度遇上多蒙特，就喺主場大勝4比1，當時全軍上下不可一世，多蒙特主席華斯基睇唔過眼大事抨擊，話賀芬咸嘅「金元足球」將會摧毀德甲正常運作，雙方球迷亦由此結怨，此後多蒙特球迷作咗好多諷刺霍普嘅歌，喺主場對賀芬咸時全力唱衰佢，兩軍碰頭時球員亦特別肉緊，今仗賽前多蒙特教練高普雖然講明唔希望球員喺歐聯決賽前受傷，但亦會為球迷而戰，並呼籲球證咪幫賀芬咸，賀芬咸上下亦意識到多蒙特唔會留手，會方賽前竟然提早向員工開刀，以球隊即將降班收入劇減為理由，裁減咗唔少職工，根本已經打定輸數。基於賀芬咸今仗喺冇選擇嘅情況下焗攻，面對反擊強勁嘅多蒙特等同自殺，今場入球大細中位數雖然調整到3.5球，大盤依然係投X首選。