國家隊棄兒Vs豪門搶手貨

猪拉多纳

今季神射手勢將鬥到最後一刻，目前利華古遜嘅傑斯寧同多蒙特嘅羅拔利雲度夫斯基分別以24同23個入球排前兩位，已經遠遠拋離其他射手，德甲金靴只係兩人之爭，兩軍賽前亦聲言會全力支持佢哋旗下射手，爭奪呢個個人獎項。

傑斯寧今季大熟大勇，近期連續四場有波入，已經後上超越咗「羅拔仔」進佔榜首，不過呢位「國家隊棄兒」始終得唔到德軍領隊勒夫青睞，經常喺多名前鋒受傷嘅情況下都唔選佢，令佢對國家隊前途意興闌珊，原本德國隊月底訪問美國踢兩場熱身賽，屆時拜仁同多蒙特主力都因為踢歐聯決賽而缺席，但傑斯寧晨早接受《圖片報》訪問時，已經表示唔想趁呢個機會入選，因為佢寧願去度假，結果勒夫當然冇選佢。

至於羅拔利雲度夫斯基就因為多蒙特季尾集中精神備戰歐聯，聯賽上陣時間減少，目前落後傑斯寧一球，但球隊上下都話會喺今仗最後主場幫助佢反敗為勝。「羅拔仔」喺歐聯準決賽對皇家馬德里嘅首回合食出「大四喜」，已經成為全球炙手可熱射手，拜仁慕尼黑、皇家馬德里、車路士及祖雲達斯等多不勝數嘅勁旅都有心將佢收歸旗下，而佢亦已表明唔會留喺多蒙特，不過究竟去邊隊，就要留番喺歐聯決賽之後至講。