史浩克出盡法「堡」 搶歐聯最後席位

猪拉多纳

德甲煞科夜爆發歐聯席位爭奪戰！今晚賽前排第5嘅弗賴堡，會喺主場迎戰「四哥」史浩克04，雙方差距只得1分，即係話邊個輸波就無緣來屆歐聯賽事，小妹有信心獲陣中猛將達斯拿續約嘅史浩克有力贏波，作客讓平半照要2.02倍上盤！

（有線61及201周六晚9:30直播）
達斯拿續約至2018振軍心

史浩克04作為傳統勁旅，眼見同區死敵多蒙特殺入歐聯決賽熱爆全球，相信佢哋都好想下季可以重拾昔日光輝！其實史浩克近況唔曳，近7戰有5場保持不敗，最好嘅當然係中場核心達斯拿宣布續約到2018年之餘，仲立誓話永遠唔會投効多蒙特，咁識賣口乖，難怪球會管理層開心到將佢續約嘅消息放上流動廣告板「示威」啦！的確，呢位被視為德國明日之星嘅年輕中場，近3場作客勝仗都有波入，堪稱「幸運童子」！
弗賴堡遇強愈弱靠唔住

至於另一主力射手亨特拉爾就喺賽前揚言今場許勝不許敗，皆因一旦和波，都仲有些少機會畀排第6嘅法蘭克福靠得失球差反超，史浩克眾將又點會唔搏甩髀先？弗賴堡由上季嘅中游分子到今季可以一爭歐聯席位，固然可喜可賀，但佢哋近排嘅走勢就似乎有所放緩喇，雖然接連兩場贏波，但對手只係榜尾分子格雷特霍夫同奧格斯堡，唔多可以作準，佢哋早前對住半力出擊嘅拜仁慕尼黑同史特加亦都照樣輸波，證明實力始終有限，中場卡利古尼又坐波監，對住史浩克未必攞到甜頭喇。
弗賴堡半場多落後

雙方近3次交手都開大。

史浩克已經連續開咗4口單。

弗賴堡近5仗4度半場落後。