史杜列治紅軍新希望

猪拉多纳

英超老牌勁旅利物浦今季四大皆空，又爭唔到前四嘅歐聯入場券，無疑令人失望，不過在少壯派主帥羅渣士嘅改革下，着重地面進攻組織，大力提拔新人，買人眼光又獨到，其中一月來投嘅史杜列治同菲臘比古天奴，予人耳目一新嘅感覺。
「大」鬧QPR謝幕

過往効力曼城及車路士，史杜列治因為太獨食而不受重用，但呢位前鋒改投紅軍後，表現脫胎換骨，頭13場為利物浦上陣轟入11粒，超越同期嘅科拿、費蘭度托利斯等，認真犀利。最近拍檔蘇亞雷斯因咬人事件被罰停賽，史杜列治更擔起進攻重責，唔單止淨係掛住自己入波，仲願意多為隊友鋪橋搭路，成個人成熟晒。

至於從國際米蘭加盟嘅菲臘比古天奴，擁有巴西人一貫嘅秀麗腳法，盤、傳、射都非常上乘，傳中更係一針見血，已成為球隊進攻嘅命脈。

呢兩位年輕球員係利物浦復興嘅希望，今晚主場對住篤定降班嘅昆士柏流浪（QPR），勢必想大勝一場光榮謝幕，雖然QPR近八場未贏過，前鋒雷米早前又涉及一宗強姦案被捕，但嚟到煞科戰，該隊已經冇嘢可以再輸，隨時放開懷抱同紅軍鬥攻，勢必合演一場入球騷，就算今仗大細中位數調至3.5球，細鬼認為大盤比「讓球主勝」更加抵玩。

（有線302及202台周日晚11時直播）