中岸死守恒大撐半場細

猪拉多纳

教頭怕出醜嚇走未來老闆

亞冠盃16強次回合今晚繼續打，廣州恒大（足智彩譯FC廣州）主場鬥中岸水手，吼實1.57倍半場細，因為恒大有射手巴里奧斯同艾傑臣缺陣，中岸教頭艾萊特為去中超搵銀，講明會做「中岸死守」避免出醜，上半場未必多波入。

（now671台、中央5台及廣東體育周三晚8:00直播）
恒大巴里奧斯 艾傑臣缺陣

首回合恒大領先2:1，由於賽程緊密，而且廣州暴雨後場地變爛又易整傷球員，向來穩字行頭嘅恒大教頭納比，睇怕唔會叫球員一開波就搏命進攻，否則浪費彈藥之餘再有主力打柴就弊。點解咁講？因為加盟前効力多蒙特嘅巴里奧斯，上場聯賽梅開二度後受傷，估計要抖3個禮拜！
廣州富力想高薪撬艾萊特

由於加盟後弗到爆嘅射手埃爾克森，因為冇註冊亞冠盃肯定冇得落場，意味恒大今場被迫用郜林拍穆里奇打雙箭頭，火力當然差啲啦！再講恒大對上7場有6次開半場細，教頭納比根本唔鍾意上半場就攤開底牌，今場玩半場入球細的確實際啲。

與此同時，中岸歷史性奪得澳職總冠軍後，近3場亞冠盃得1勝2負，但教練艾萊特冇打算投降，仲話要死守到比賽尾段，然後偷雞入兩球晉級喎！艾萊特咁講，唔排除佢係怕輸得多，嚇親想高薪撬佢過檔嘅廣州富力高層，照咁睇，兩隊上半場冇交收一啲都唔出奇。

首回合恒大客勝2:1
亞冠盃賽制

採主客兩回合制，今輪為16強次回合。如法定時間內打和，先計算作客入球優惠，未分勝負將於次回合法定時間後加時30分鐘，再和則互射12碼決勝。