賀芬咸死過翻生追多鋪

猪拉多纳

相比起平淡嘅英超收咧日，上星期早一晚煞科嘅德甲就刺激得多，原本危機最大嘅賀芬咸要作客多蒙特，正常諗佢哋都係九死一生啦，點知最終佢哋好戲劇性咁逃出生天！

好多人都討論，最終嗰球問題球係咪越位？其實我覺得無論羅拔利雲度夫斯基有冇掂到個波，都肯定有阻礙門將判斷，入球唔成立可以理解。就係因為呢個入波作廢，杜塞爾多夫就直接做咗「升降機」降班跌回德乙，畀賀芬咸有個重生機會！今晚於護級附加賽首回合主場迎戰凱沙羅頓，小妹睇好賀芬咸主場出擊，可以先贏一仗。

賀芬咸的確幾有決心護級，尤其係上星期落後都搏到兩球十二碼反勝，完場後高興過捧盃，隊波士氣返晒嚟！陣中兩大王牌沙利荷域及禾蘭狀態重上高鋒，有望成為今晚護級附加賽救星！另外年輕門將卡斯迪爾斯剛戰對住多蒙特力挽狂瀾，演出身價，今晚有佢把關，賀芬咸真係信得過！
凱沙羅頓作客守唔住

凱沙羅頓以德乙第三完成賽事，其實佢哋都係另一隊升降機，球迷應該唔會陌生。季尾佢哋表現唔多穩定，先後輸畀無慾無求嘅科特布斯同聖保利，最大問題係失球偏多，近四場總共失八球，而且最唔掂係作客成績極差，由上年十一月開始，十場作客只贏兩場，最近一場作客贏嘅對手，只係晨早已經護級失敗嘅雷根斯堡。球隊「自己知自己事」，今晚作客應該會踢得保守啲，但咁樣反而可能畀賀芬咸有機可乘。

（有線61及64台周五凌晨2時30分直播）
阿Kit推介：賀芬咸 對 凱沙羅頓 主勝