法乙煞科摩納哥等散班信唔過

猪拉多纳

法乙今晚煞科，杜亞斯喺主場對摩納哥，冷敲受讓嘅1.72倍「讓球主勝」有着數。雖然杜亞斯冇嘢好爭，但摩納哥提早捧盃升班更加信唔過，因為佢哋瀕臨「另類散班」，唔止教練雲尼亞里冇得撈，部分主力都要執包袱，仲邊有心情搏命呀？

（開賽時間：周六凌晨2:30）
杜亞斯主場16戰僅2敗

摩納哥喺中東老細支持下重返法甲，大家焦點係文仙尼係咪又搵到筍工，根本冇人理等炒魷魚嘅雲尼亞里感受。同時，據講摩納哥除咗睇中法卡奧，仲會至少簽多5個星級球員，即係基本上有半隊主力被打入冷宮，捧完盃確定有獎金，仲搵鬼同佢哋搏咩？

難聽啲講，依家摩納哥球員嘅心情就好似等散班咁，呢場踢成點，睇怕冇乜人會在乎，就算雲尼亞里可能想好好睇睇搵番份好工，恐怕都嗌唔郁班球員為佢賣命。仲有，咪睇杜亞斯傷兵滿營以為好恰，實情佢哋近16場聯賽主場得2次輸波，其餘14戰有9勝5和，有分落袋好正常。