山葉客戰三神博大霧

猪拉多纳

新帥未到無王管

日職名牌球會磐田山葉開季陷入低潮，現時喺聯賽位列尾二，今輪作客會同包尾大幡大分三神合演榜尾對決。山葉啱啱請咗名帥關塚隆救亡，但佢喺球隊踢埋今場先開工，今戰成班孤兒仔繼續亂踢，作客讓波咪搞！三神中前場球員上晒力，今場玩大盤最好！

(周六下午2時30分開賽)

磐田山葉近季喺日職冇乜作為，今季仲衰到沉淪谷底，教頭森下仁志早前已落鑊，會方成功搵到川崎前鋒舊帥關塚隆領軍，佢上年帶領日本參戰奧運後離隊，今次出山教山葉，正路可幫到班波。不過，關塚隆同球會只係簽咗八個月短約，話就話睇吓教成點先決定係咪續約，換個角度睇，佢搞唔掂就可走人，唔使畀人拖住，呢點對球會絕對唔係好事。
三箭回勇添食

關塚隆匆匆上任，並不急於領軍，今戰唔會帶隊，續由看守教頭長澤徹頂住先，佢都係替工，冇乜心搞，大軍難有太大起色。山葉前面有前田遼一及金園英學等射手，計火力唔弱，今次自由發揮，相信都係瞌埋眼搶攻。另一邊廂大分三神連續兩場贏波，加埋轟入六球，箭頭丸谷拓也上仗仲喺盃賽大演帽子戲法，今次又同對手死過，預期多波入，捧大盤。

同日衞冕球隊廣島三箭作客湘南比馬，三箭喺亞冠盃出局後專心打聯賽，逐步回復水準，上場5比1大炒甲府風林，踢出本季代表作，王牌射手佐藤壽人連中三元，腳風順番晒，今次對住下游分子比馬可望添食，捧客勝！