軒歷基斯勝在老謀深算

猪拉多纳

68歲嘅軒歷基斯曾經講過，拜仁教練係全德國第二難打嘅工，僅次做德國總理，因為只許成功不許失敗，每逢比賽就要破斧沉舟，佢同多蒙特教頭高普都係頂呱呱嘅主帥，深信軒帥嘅老謀深算喺歐聯決賽會發揮關鍵作用。

軒帥仲早過費爵爺宣布教埋今季退休，佢執教生涯只攞過一次歐聯冠軍加三個德甲冠軍，點都唔及喺高峰引退咁激盪人心，換言之佢嘅成與敗就睇呢一鋪。軒帥花咗唔少時間重建拜仁，加強同球員溝通搵番踢波嘅樂趣，兼且用人不疑，令到拜仁成為真正嘅團隊，跟住全面革新戰術，喺講求控球在腳嘅同時，明顯提高速度同兩翼推進，令拜仁得以愈戰愈勇，殺到去最後決勝階段。

當然，多蒙特教頭高普亦唔係善男信女，「蜜蜂兵團」近幾季流失主將依然咁勁，高普居功至偉，但佢喺德國盃輸畀拜仁之後，指摘軒歷基斯抄佢戰術就太過心浮氣躁，少少情緒波動都會影響決賽大局呀！