替天行道換人贏得

猪拉多纳

　　望落今日戲碼幾好賭，有好幾場熱門格局，唔會爆得出樣，只可惜，今日唔知個天係點？！如果整場雨，到時場地黏軟，熱門死火話唔埋。所以，呢期賽事唔係冇得「劈」，但一定要臨場執生，如果天氣情況惡劣，縮注係必然，千祈咪硬頸。

　　第二場四班1600米。「時來風送」季初此程仲同緊「首飾孖寶」、「好主意」交手，唔知點解跑至季尾始可出頭，總之，遲到好過唔到。而睇隻馬上場贏得十分清脆，有冇用到八成力？真係未必有。今次在原班再跑，對手咪又係「勝利攻略」，或者更水皮賽駒，形勢一流。而阿航爭緊冠軍，呢類新勝馬唔會1W夠皮，贏開一定繼續搏。

　　第五場二班1800米。「替天行道」上次被捧成大熱，後上跑獲殿軍，唔係直路遲發力，未必冇第三名。呢次隔晚同樣成為大熱門，賠率比上場更加熱，3倍唔夠，擺明係信心墊底飛。希望呢次換人，巫斯義走位醒過馬偉昌，為此駒打開勝利之門。

　　第十場三班1200米。「卓爾名駒」上仗贏來吃力，可能係沿途望空，但就係全憑巫斯義早段機警，一早霸住好位，先至冇畀「星運俊爵」走甩。今場其實與上場唔會有好大分別，若果早段大家慢慢放，「卓爾名駒」6檔起步趁早守好位，有機會再贏。