意盃打吡決戰 拉素唔驚黑狼

猪拉多纳

羅馬近7次入決賽得2次封王

意大利盃91年歷史上，破天荒上演「首都打吡」！羅馬今晚喺奧林匹高球場決戰拉素，賽果代表兩隊今季成敗，當中羅馬嘅救火教頭安祖亞索利想留低，今場肯定要贏波至掂，弊在羅馬近7次入決賽得2次捧盃，咁黑仔拉素受讓平半抵玩啲喎！

（now635台周一凌晨0:00直播）

原本呢場決賽諗過移師北京鳥巢體育場舉行，不過羅馬同拉素擔心門票問題影響收入提出反對，最後喺番兩隊共用嘅奧林匹高球場鬥片。陣容方面，雖然羅馬今場有聯賽收咧戰停賽嘅隊長托迪復出，中場迪羅斯同後衞巴沙列堤傷愈可以落場，但佢哋仲未決定係咪留用59歲教頭安祖亞索利，軍心好容易受到動搖。
羅馬想易帥損士氣

事實上，羅馬喺安祖亞索利季中接手上任後爬番上第5名，功勞絕對有，問題係管理層覺得佢領軍風格唔夠好睇，唔適合羅馬嘅風格，所以周圍放風要簽新教練，即使安祖亞索利開到口恨留低都冇人理，佢點會唔灰呀？再講，自93年起羅馬7次踢決賽，只得07年同08年能夠捧盃，呢場遇正宿敵隨時出事有咩奇？
拉素靴蘭尼斯專射狼

拉素同羅馬一樣入唔到聯賽前5名，想踢下屆歐霸盃就要贏呢場波至得，鬥心肯定唔會輸蝕，而且37歲中場布洛治因傷患問題最近宣布提早退役，相信拉素球員都會希望用獎盃歡送佢離隊。仲有呀，傳聞被AC米蘭睇中嘅中場靴蘭尼斯，近4次打吡3次射破羅馬大門，恰到對方上心口，既然羅馬近年入意大利決賽運氣普通，梗係捧拉素着數啦！
拉素近期交手佔上風

羅馬與祖雲達斯歷來捧盃次數最多，先後9次封王，當中羅馬曾16次入決賽。

羅馬今季意甲攻入73球，火力僅次亞軍嘅拿玻里，入球數字同冠軍祖雲達斯一樣。

拉素以往7次入決賽，5次奪得冠軍。

拉素近4次對賽得3勝1和。
羅馬旺半細值得跟進

除咗拉素受讓平半下盤，今場意大利盃決賽1.45倍半場入球細都玩得過，特別係羅馬已經連續4場開半場0:0波膽，睇得出看守教練安祖亞索利嘅戰術唔算特別進取，而且佢哋近7場有6場開半場細，期間得1次半場領先已篤定降班嘅錫耶納3:0係例外，試問拉素同羅馬咁大仇口，又點會任數呢？上半場唔似多波入。
決賽賽制

決賽於奧林匹高球場舉行，如法定時間打和將加時30分鐘，未分勝負則互射12碼決勝。