決賽Sunday 捧哥登堡W些路迪大 2013/05/26

猪拉多纳

為遷就今朝凌晨上演嘅歐聯決賽，除咗挪超之外，歐洲各大聯賽都延至今晚先上演，並有多項盃賽決賽舉行，當中包括意大利盃、葡萄牙盃、蘇格蘭足總盃及瑞典盃。
蘇總王者戰例開入球騷

由於瑞典盃今屆改制，變成一項跨年嘅盃賽，因此瑞超只係完成咗10周，瑞典盃就已經去到終極一戰，決賽由佐加頓斯大戰哥登堡，比賽於中立場蘇納友誼球場進行。近期多個盃賽，包括英格蘭足總盃及西班牙盃都爆到甩轆，但相信瑞典盃熱門球隊哥登堡今晚可以順利捧盃，畢竟佢哋今季喺瑞超表現對辦，聯賽暫列第2，反觀佐加頓斯就係包尾大幡，上圈面對今季先升上瑞甲嘅奧基迪，亦只係以1:0僅勝，晉級過程毫無說服力，今場正路要捧1.88倍哥登堡W。

（開賽時間：周日晚11:00）

至於喺咸普頓公園上演嘅蘇格蘭足總盃決賽，相信些路迪能夠擊敗喜伯年嘅機會相當之大，畢竟佢哋近6次殺入決賽，有5次能夠喺法定時間內擊敗對手奪冠，反觀喜伯年過往12次殺入足總盃王者戰，最終只得兩次捧盃，但問題係些路迪個W得1.23倍，完全冇投X價值，倒不如諗諗1.59倍入球大好過，事關佢哋對上3圈都係開入球騷，近5屆決賽亦有4次開大，不妨追多鋪。

（開賽時間：周日晚10:00）
荷附、瑞盃及蘇總賽制

荷蘭附加賽：

採主客兩回合制，今場為次回合。若兩回合計打和就計作客入球優惠，未分勝負則再於次回合法定時間後加時30分鐘，加時階段仍計作客入球，再和就互射12碼分勝負。

瑞典盃及蘇總：

今場為決賽，瑞典盃於蘇納中立場、蘇總則於咸普頓中立場舉行。如法定時間打和，即加時30分鐘，如未分勝負再互射12碼決定冠軍。