德國讓波難逃厄運

猪拉多纳

冇仁冇蜜殘陣征美

周日凌晨拜仁對多蒙特於歐聯決賽上演同室操戈，今晚輪到德國國家隊登場，遠赴美國佛羅里達州出戰南美球隊厄瓜多爾，今次領隊勒夫未有徵召拜仁球員，而蜜蜂兵團多蒙特亦只有1人入選兼冇正選，天殘地殘試陣味濃，面對攻力強勁嘅厄瓜多爾，防線隨時大穿窿，「讓球客勝」更加值博。

（無綫翡翠台周四凌晨2時30分直播）

呢次美洲之旅，德國隊安排咗踢兩場熱身賽，與尾場硬撼由前德國主帥奇連士文率領嘅美國相比，對住厄瓜多爾無疑冇咁矚目，除一眾拜仁國腳全部缺席之外，連剛踢完歐聯決賽嘅多蒙特中場哥斯基奧斯亦因傷高掛免戰牌，「蜜蜂兵團」隊友施雲賓達以及拉素前鋒高路斯，亦只能滾水淥腳趕去會合大軍，舟車勞頓之下，睇嚟勒夫今仗都會收起唔用，前線只靠普多斯基單天保至尊，帶住小將舒賀爾尼、達斯拿、悉尼森姆等攻堅，實力大削。

冇拜仁球員有幾大影響？淨係望下條防線，勒夫可能要用到賀維迪斯、梅迪薩卡、韋斯達文、艾奧高臨時拉伕嘅防線，全無默契之餘，由轉身超慢嘅梅迪薩卡與韋斯達文扼守中路，隨時中門大開勁唔穩陣。由於西甲未收咧，皇馬中場雙星基迪拉同奧斯爾亦都冇入選，勢必影響德軍嘅攻守轉換速度。
厄瓜多爾近況弗爆

咁蹺厄瓜多爾近5戰贏足4場狂轟16粒，信心爆晒棚，中鋒卡些度更包辦5球着晒火，佢拍住賓尼達斯、路爾斯華倫西亞及同擅於後上入楔嘅謝法臣蒙迪路，一定搞到德軍後防風聲鶴唳，厄軍有得受讓筍到爆，首選「讓球客勝」，另可捧埋「入球大」。