德國盃話當年

猪拉多纳

第50屆德甲啱啱煞科，但講到德國盃，今年已經係第70屆，雖然對好多大球會嚟講，國內盃賽地位遠遠唔及聯賽同埋歐聯，但拜仁就永遠係德國盃嘅支持者。佢哋歷來曾經15度奪冠，拋離其他球會（雲達不來梅居次，都只係贏過6次），而且德國盃獎金亦比其他國家盃賽高，若然拜仁今晚奪冠，總獎金將達680萬歐元（約6,800萬港元）。
1982 D漢尼斯血的印記

單計近10屆賽事，拜仁已經攞咗5屆冠軍，不過如果講最經典戰役，Oliver要數番1982年，拜仁喺決賽同紐倫堡踢巴伐利亞打吡，比賽喺法蘭克福上演。當時拜仁聯賽爭霸形勢緊湊，又打入歐聯決賽準備喺一星期後對英格蘭阿士東維拉，周身都唔得閒，但佢哋完全冇揸流攤。

紐倫堡嘅奧地利球員軒達美亞先喺離門40碼射入世界波，跟住達歷素喺半場前仲將紀錄改寫成2比0。

當大家以為拜仁會輸嘅時候，當時嘅一眾球星包括畢列拿、歐真泰拿同路明尼加喺下半場群起反撲，而現任會長漢尼斯嘅胞弟D漢尼斯更晨早勇戰穿頭，包紮後始終無法止血，搞到血流披面，但仍堅持比賽，最終拜仁先後由路明尼加同畢列拿嘅入波扳平，直至完場前，仲流緊血嘅D漢尼斯成功絕殺反勝，為拜仁寫下德國盃史上難忘嘅一頁。